Məmməd Musa oğlu Adilov

Məmməd Musa oğlu Adilov, filologiya elmləri doktoru, 1953-cü ildə Şəki şəhərində anadan olmuşdur. 1976-cı ildə Bakı Dövlət Universiteti şərqşünaslıq fakültəsinin ərəb filologiyası şöbəsini bitirmişdir, 1984-cü ilin sentyabrından Əlyazmalar İnstitutunda işləyir. 2003-cü və 2008-ci illərdə institutun direktoru vəzifəsinə seçilmişdir. İndiyədək 16 kitab, 200-dək məqalə nəşr etdirmiş, 100-dən artıq kitabı redaktə etmişdir. İSESKO-nun Rabatda (1993) və Qahirədə (1996) keçirilmiş simpoziumlarında iştirak etmiş, həmçinin Moskvada, İstanbulda, Tehranda, Vilnüsdə, Aşqabadda, Məkkədə, Konyada, Urmiyada, Qazanda, Türküstanda elmi ezamiyyətlərdə olmuşdur.
1999-cu ildə «Kitabi-Dədə Qorqud»un yazıya alınmasının 1300 illik yubileyini, 2003-cü ildə isə Xacə Nəsirəddin Tusinin 800 illik yubileyini keçirən dövlət komissiyalarının üzvü olmuşdur. Azərbaycan Respublikasının Prezidenti yanında Ali Attestasiya Komissiyasının filologiya elmləri üzrə ekspert şurasının üzvüdür. «Əlyazmalar xəzinəsində» jurnalının baş redaktorudur.
2003-cü ildə AMEA Rəyasət Heyətinin Fəxri Fərmanı, 2005-ci ildə isə «Tərəqqi» medalı ilə təltif olunmuşdur.

17 oktyabr 2011-ci il tarixində vəfat etmişdir.