Əli Əliyev

Əli Məmmədbağır oğlu Əliyev, filologiya elmləri namizədi, 1955-ci ildə Nefçala rayonunun Qədimkənd kəndində anadan olmuşdur. 1988-ci ildən Əlyazmalar İnstitutunda işləyir. Elmi fəaliyyəti əsasən institutun xəzinəsində saxlanılan yazılı abidələrin paleoqrafik və tekstoloji tədqiqi, onların transfoneliterasiya edilib nəşrə hazırlanması ilə bağlıdır. Apardığı elmi araşdırmaların nəticəsi olaraq 1997-ci ildə «XVII əsr Azərbaycan əlyazma kitabı (paleoqrafiya və mətnşünaslıq məsələləri)» mövzusunda dissertasiya yazıb müdafiə etmişdir. Fəaliyyəti ərzində Mir Möhsün Nəvvabın, Mir İbrahim Ağamirzadənin, Mirzə Yusif Qarabağinin, Məşhədi Hilal Kazımovun, Dadaş Rzazadənin əsərlərini nəşr etdirmiş folklor abidələri üzərində işləyərək «Bəxtiyarnamə» dastanını və «Türk əlyazmaları kataloqu»nun folkloru əhatə edən birinci cildini nəşrə hazırlamışdır.