24 iyun 2016-cı il tarixdə AMEA-nın Məhəmməd Füzuli adına Əlyazmalar İnstitutunda Dünya Azərbaycanlılarının IV Qurultayının nümayəndə heyətinin üzvləri, İsveçdə fəalliyyət göstərən Azərbaycan Diaspora təşkilatının yaradıcısı, hal-hazırda Stokholm Şəhər İcra Hakimiyyəti aparatının şöbə müdiri müavini, şəhər məhkəməsi hakiminin köməkçisi Leyla Kiani, Küveytdəki Azərbaycan_-Küveyt dostluq cəmiyyətinin təşkilatçısı və rəhbəri Könül Hacızadə və bu təşkilatın fəalı Bədi əl Əloudi ilə görüş keçirilmişdir. 

“Elm” nəşriyyatında XIX əsrin sonları XX əsrin birinci yarısında yaşamış “Novbəri” təxəllüslü Kərbəlayi Qara Məşədi Süleyman oğlu  Əliyevin lirik şeirlər toplusu-divanı çapdan çıxmışdır. Buna qədər C. Nağıyeva və T. Nurəliyeva şairin Füzuli qəzəllərinə yazdığı təxmisləri nəşr etdirmişdilər. Əlyazmalar İnstitutunun aparıcı elmi işçisi, filologiya üzrə fəlsəfə doktoru Tahirə Nurəliyeva Novbərinin divanını müasir əlifbaya transfoneliterasiya etmiş, kitaba ön söz yazmışdır. Kitabda ərəb-fars sözlərinin ayrıca lüğəti verilmişdir.
    Kitabın redaktoru Hacı Mustafa Mailoğludur.

AMEA-nın Məhəmməd Füzuli adına Əlyazmalar İnstitutunun aparıcı elmi işçisi, fil.ü.f.d., dosent Nəzakət Məmmədli 30 may - 3 iyun, 2016-cı il tarixlərində Şri-Lanka Sosialist Demokratik Respublikasının Oluvil şəhərində yerləşən Soush Eastern Universitetinin təşkil etdiyi “Ərəb dili və islam araşdırmalarının milli inkişafda rolu” mövzusunda simpoziumda iştirak etmişdir.

Bu günlərdə  AMEA-nın Məhəmməd Füzuli adına Əlyazmalar İnstututunu keçən il ziyarət etmiş Oksford Universitetinin professoru Nigel F.Palmerdən Əlyazmalar İnstitutunun elmi işlər üzrə direktor müavini, fil.ü.e.d. Paşa Kərimova məktub göndərilmişdir. Burada o, institutun zəngin əlyazmalar xəzinəsi, mütəxəssisləri barədə təəssüratını ifadə edir və minnətdarlığını bildirir. Məktubda deyilir: “Əziz doktor Paşa Kərimov! Səfərimi belə uğurlu etdiyiniz üçün Sizə və həmkarlarınıza minnətdarlığımı bildirirəm. Mənim elmi araşdırma sahəsindəki maraq dairəmə Qərbi Avropanın orta əsrlər əlyazma mədəniyyətinin öyrənilməsi daxildir. 50 il ərzində bunu araşdırmışam və təxminən 1520 kitab nəşr etdirmişəm. Sizin əlyazma xəzinəniz araşdırma üçün geniş imkanlar verir. Xəzinəniz məndə xüsusi maraq doğurdu. Sizin və həmkarlarınızın qeyri-rəsmi və qayğıkeş ünsiyyəti mənim səfərimi, təəssüratlarımı xoş edən səbəblərdən oldu. Əlyazmalar İnstitutunda belə bir komandanın olduğunu görmək mənim üçün çox xoşdur. Ümid edirəm ki, gələcəkdə bir də Azərbaycana səfər etməli olsam bir daha sizi ziyarət edə biləcəyəm. Mən əminəm ki, sizin bütün dünyanın müvafiq idarələriylə əlaqələriniz vardır. Demək istəyirəm ki, nə vaxtsa Oksfordla və ya Bodlean kitabxanası ilə yeni əlaqələr yaratmaq istəsəniz, lütfən kömək üçün mənə müraciət etməkdən utanmayın. Zəhmət olmazsa, mənim xoş arzularımı ziyarətimin uğurlu alınmasında iştirak edən Əzizağa Nəcəfov, Nigar Babaxanlı və Əkrəm Bağırova da çatdırın.
Hörmətlə, pr.Nigel F. Palmer

2 iyun 2016-cı il tarixdə ABŞ-ın Kanzas Universitetinin müəllimləri dr. Lyuis Mennerik və dr. Mehrəngiz Nəcəfizadə AMEA-nın Məhəmməd Füzuli adına Əlyazmalar İnstitutunun qonağı olmuşlar. İnstitutun elmi işlər üzrə direktor müavinləri fil.ü.e.d. Aybəniz Əliyeva-Kəngərli və fil.ü.e.d. Paşa Kərimov qonaqlara Əlyazmalar İnstitutunun tarixi, məşğul olduğu problemlər barədə məlumat vermiş və onları institutun sərgisi ilə tanış etmişlər. 

Əlyazmalar İnstitutunun elmi işlər üzrə direktor müavini  fil.ü.e.d.Paşa Kərimov Almaniyada yaşayan soydaşımız Məhəmmədəli Hüseyninin yardımı ilə adı indiyədək ədəbiyyat tariximizə düşməmiş Abdulla Bərqi Xoyinin şeirlərinin surətini əldə etmişdir. Şairin Tehranın Məclise-Şuraye-İslami kitabxanasında saxlanan farsca əlyazma divanına daxil edilmiş azərbaycan dilində olan şeirləri böyük maraq doğurur. Bu əsərlər lirik-aşiqanə mövzulu qəzəllərdən və növhələrdən ibarətdir. Təzkirələrin verdiyi məlumatlardan  və şeirlərindən  Bərqinin istedadlı, səmimi şair olduğu görünür. Paşa Kərimovun fikrinə görə, XIX əsr ədəbiyyat tariximiz yazılarkən Abdulla Bərqi Xoyinin irsi də nəzərə alınmalıdır.

AMEA-nın Məhəmməd Füzuli adına Əlyazmalar İnstitutunun “Beynəlxalq əlaqələr şöbəsi”nin müdiri, tar.ü.e.d., prof. Fərid Ələkbərlinin ingilis dilində “Horses of Azerbaijan: a historical survey”(“Azərbaycan atları: tarixi icmal”. Bakı, AAMH, 2016) yeni kitabı çapdan çıxmışdır. Kitabda Azərbaycan atçılıq sənətinin tarixindən, şifahi ədəbiyyatda at obrazlarının meydana gəlməsi və inkişaf yolundan, təsviri sənətdə, tarixi mənbələrdə, o cümlədən orta əsr əlyazmalarında və digər arxiv sənədlərində at təsvirlərindən bəhs olunur. Geniş oxucu kütləsi üçün nəzərdə tutulmuş kitabda yığcam tarixi icmal formasında Qarabağ atı, Dilboz, Quba yorğası, Şirvan atı kimi at cinsləri və onların formalaşma tarixi haqqında müfəssəl məlumatlar yer almışdır.

2016-cı il may ayının 12-14 tarixlərində Türkiyənin Konya şəhərində keçirilən “VI.Uluslararası Türk sanatı tarihi ve folkloru konqresi sanat etkinlikleri” adlı elmi konfransda AMEA-nın Məhəmməd Füzuli adına Əlyazmalar İnstitutunun “Türkdilli əlyazmaların tədqiqi” şöbəsinin elmi işçisi Əliyeva Tahirə Oqtay qızı iştirak etmişdir. Konya Bələdiyyə sədri Tahir Akyürekin şərəfinə təşkil edilmiş bu konfransda Türkiyə, Azərbaycan, Almaniya, Makedoniya, İtaliya, Moldova (Qaqauz) və s. ölkələrdən gələn  nümayəndə heyəti olmuşdur. Mayın 12-də Mövlana mədəniyyət mərkəzində konfrans öz işinə başlamış və  28 bölmədə aparılmışdır. Elmi işçimiz Tahirə Əliyeva 5-ci bölmədə “Piri Rəisin “Kitabi- bəhriyyə” əsərində yeddi dəniz” adlı elmi məqalə ilə çıxış etmiş və böyük maraqla qarşılanmışdır. 

23.05.2016-cı il tarixdə AMEA-nın Məhəmməd Füzuli adına Əlyazmalar İnstitutunun Elmi Şurası keçirildi. Gündəlikdə dayanan məsələlərdən biri institutun qocaman əməkdaşı, ağac üzərində xətt-oyma sənətinin ustadı Seyfəddin Məsimoğlunun 80 illik yubileyi idi. Yubiley barədə məlumat verən institutun direktoru, akademik Teymur Kərimli S.Məsimoğlunu təbrik edərək sözü institutun elmi işlər üzrə direktor müavini, fil.ü.e.d. Paşa Kərimova verdi. O, Seyfəddin Məsumoğlunun keçdiyi həyat yolundan, yaradıcılıq işlərindən, onun institutdakı yorulmaq bilməyən uzun və səmərəli fəaliyyətindən müfəssəl danışdı.

21 mayın 2016-cı il tarixdə AMEA-nın Məhəmməd Füzuli adına Əlyazmalar İnstitutunun iki alimi - elmi katib, fil.ü.f.d. Əzizağa Nəcəfzadə və böyük elmi işçi, ilah.ü.f.d. Əkrəm Həsənov Azərbaycan Turizm və Menecment Universitetində (ATMU) “Azərbaycanda multikulturalizm yaşam tərzidir” mövzusunda keçirilən Respublika elmi konfransında iştirak etmişlər. Alimlərin "Seyid Əbülqasim Nəbati yaradıcılığında multikultural dəyərlər" mövzusunda məruzəsi elmi konfrans iştirakçılarının xüsusi marağına səbəb olmuşdur.